Në një moshë fare të re, pa i mbushur akoma 21 pranvera, ndërroi jetë i riu nga Tërnoci Abelard Kamberi.
Lajmi i hidhur për humbjen e papritur të Abelardit, mbushi pikëllim jo vetëm familjarët e farefisin, por edhe të tjerët që e njohën për mes bankave shkollore e studentore.
Vdekja e hershme e Abelardit u përshkua nga një varg ngushëllimesh të shumta, të cilat erdhën në adresë të familjes Kamberi.
Në rrjetin e tij social, kryetari i Komunës së Bujanocit, Shaip Kamberi, i cili Abelardin e kishte djalë të vëllait shkruan: “ Ju familjarë, miq e dashamirë të nderuar, që na qëndruat pranë në këtë betejë të gjatë e të mundimshme për ta shpëtuar Abelardin, nga zemra ju falënderoj dhe u jemi mirënjohës në jetë të jetëve. Uroj që Allahu i Madhërishëm të mos lejojë kurrë sprova të këtilla në familjet tuaja”.
Varrimi i të ndjerit, dritë pastë, Abelard Kamberi, do të bëhet sot (e mërkurë) më 15 mars në varrezat qendrore në Tërnoc me Namazin e Drekës./jetapress/
Në vazhdim po e japim një poezi elegjike kushtuar Abelardit:
ELEGJI
ABELARDIT
Luleborat e para
Me gjithë bardhësinë
Për një çast e ndalën
Pranverën n’Luginë
Në prag të një stine
N’kulm të lumturisë
Këputet dhe një lule
N’lulen e rinisë
Niset për amshim
Në rrugën pa kthim
Duke lënë nga prapa
Një jetë me kujtim
Të ëmbël të dashur
Si një vepër arti
Tamam engjëllor
Siç ish Abelardi
Dhe ndahet nga jeta
Që e deshi shumë
Me një det kujtimesh
Që rrjedhin si lumë
Që s’kanë për tu shuar
As të zverdhen kurrë
Si lule Tërnoci
Që shkëlqen si nur
Kaltrina Hyseni
