Para 23 vjetësh, pikërisht, më 22 qershor të vitit 1994, në Raincë të Preshevës, në vendkalimin hekurudhor, humbi jetën tragjikisht, Rexhep Hasanit, nga Bujanoci, sekretar i përgjithshëm i Partisë për Veprim Demokratik, me seli në Preshevë.
Lajmi për vdekjen tragjike, të politikanit dhe veprimtarit të devotshëm për çështjen shqiptare, mbushi me hidhërim dhe pikëllim, jo vetëm shqiptarët e Luginës, por edhe më gjerë në hapësirat e etnikumit shqiptar.
Dy vjet pas organizimit të Referendumit për Autonomi politike – territoriale me të drejtë bashkimi Kosovës”, shuhet nga jeta funksioneri i lartë i PVD-së, veprimtaria e të cilit edhe sot përkujtohet me pietetin më të lartë.
Virtytet e një politikani të orëve të para të demokracisë në Luginë të Preshevës, si Rexhep Hasani edhe në të ardhmen do të shërbejnë si shembull i mirë se si duhet t’i shërbejmë vendlindjes e mbi të gjitha Atdheut tonë të ndarë në shumë kufij shtetërorë e politikë.
Sot klasa politike e Luginës së Preshevës e kujton me mall e krenari veprimtarin e palodhshëm të çështjes kombëtare, Rexhep Hasanin, duke kujtuar,gjithmonë, me respekt punën e tij si profesor, intelektual, politikan, si mik i mirë dhe prind i mrekullueshëm, thuhet në një koment të Portalit JetaPress.
