BIPBM – falënderon Fondacionin “ALSAR”, që me një donacion nga Holanda dhuroi materiale shkollore për nxënësit e Luginës së Preshevës

Dje, në një aksion të përbashkët midis përfaqësuesve të Bashkësisë Islame për Preshevë, Bujanoc dhe Medvegjës (BIPBM) dhe përfaqësuesve të Fondacionit “ALSAR”, nga Shqipëria, përkatësisht të një donacioni nga Holanda, u bë shpërndarja e materialit shkollor: çanta, fletore, kompasë, lapsa, vizore etj, nëpër shkollat e Komunës së Bujanocit dhe Preshevës.

Jetapress, mëson se edhe sot aksioni për realizimin e projektit vazhdon në pesë shkolla fillore, në vlerë prej 9200 euro, ku me ç’rast janë blerë 1049 çanta brenda të cilave janë vendosur nga 5 fletore, 4 lapsa, 1 kimik, 1 kompas dhe nga një komplet me vizore për çdo nxënës të klasave të dyta e të treta veç e veç.

Ky donacion ishte i mirëpritur nga nxënësit dhe drejtorët e shkollave në Luginë të Preshevës, të cilët me kënaqësi i pranuan dhuratat, duke i falënderuar nga zemra për mirësinë që kanë treguar në drejtim të këtyre ndihmave shumë të nevojshme për procesin arsimor.

Kjo është ndihma e parë konkrete e Fondacionit për arsim dhe kulturë “ALSAR”, nga shteti amë Shqipëria, e cila përmes donacionit nga Holanda, po realizon projektin ndihmë shkollave me pajisje shkollore, me shpresë se në të ardhmen nuk do të mungojnë ndihmat e tilla edhe në fusha te tjera të veprimtarisë njerëzore.

Myftiu i Luginës së Preshevës, Nexhmedin ef. Saqipi, mysafirët e misionit humanitar nga Shqipëria e Holanda, i priti në mënyrë vëllazërore, duke i falënderuar për ndihmën që kanë ofruar për shkollat e këtij rajoni, të cilat kanë nevojë për ndihma dhe përkrahje morale. Me këto ndihma jepet një mesazh i fortë se qytetarët e Luginës, nuk janë të harruar nga miqtë tanë ndërkombëtarë dhe një shpresë e mirë për të mos i braktisur vatrat e tyre, të goditura nga skamja dhe mjerimi ekonomik, njofton jetapress.