Shitën tre turistë italian për 43 euro në Meksikë

Autoritetet meksikane kanë nisur procedimin penal kundër katër policëve që akuzohen se kanë gisht në zhdukjen e tre turistëve italianë në vendin e tyre.

Burrat nga Napoli janë parë për herë të fundit në datën 31 janar, në Tekalitlan, në shtetin e Haliskos. Guvernatori i këtij shteti tha se oficerët kanë pranuar që i kanë dorëzuar italianët te një bandë kriminale lokale, shkruan KP.

Djali i njërit prej burrave të humbur tha në një radio italiane se të tre janë shitur te kjo bandë për 43 euro, por autoritetet meksikane nuk e konfirmojnë këtë informacion.

Nuk është e qartë pse Raffaele Russo (60 vjeç), djali i tij 25-vjeçar Antonio dhe nipi i tij 29-vjeçar Vincenzo Cimmino, kishin shkuar në Tekalitlan, një zonë që kontrollohet nga karteli Brezi i Ri i Haliskos, një nga bandat kriminale më të mëdha të Meksikës. /Telegrafi/