Del në ankand dorëshkrimi i “Dasmës së Figaros”

Versioni i parë i një arieje të njohur të “Dasmës së Figaros” të Mozartit, i vlerësuar deri në 500,000 euro, dhe një serenatë e rinisë së kompozitorit, do të dalin në ankand më 20 qershor në Paris, sipas kompanive të ankandeve.

Këto dorëshkrime muzikore janë pjesë përbërëse e një koleksioni të madh, të mbledhur nga “Aristophil”, kompania franceze në qendër të një mashtrimi në shkallë të gjerë në dëm të aksionerëve të vegjël.

E vlerësuar 500,000 euro, një dorëshkrim i cilësuar i jashtëzakonshëm, tregon versionin e parë të një skene të aktit të fundit te “Dasma e Figaros” (1786).

Dorëshkrimi pritet të dalë në ankand nga kompania “Ader Nordmann”, të mërkurën e ardhshme.

E titulluar “Scena con Rondo”, këto katër faqe janë veçanërisht të rëndësishme, pasi ato zbulojnë Mozartin në punë, në valën e meditimit.

Dorëshkrimi i dytë është një fragment i një serenate të moshës së rinisë së Mozartit, e kompozuar në Vjenë në korrik-gusht të vitit 1773, me shumë gjasa me kërkesë të kancelarit të landit të Salsburgut, një mik i familjes Mozart, për të festuar përfundimin e studimeve të djalit të tij.

E vlerësuar deri në 150,000 euro, partitura e një ”teksti orkestral skicë” sipas kompanisë së ankandeve ”Aguttes”, u kompozua nga Mozart kur ishte vetëm 17 vjeç.

E krijuar në vitin 2003, kompania “Aristophil” u propozoi rreth 18,000 aksionerëve për të investuar kursimet e tyre në dorëshkrime prestigjioze, që do të kishin një çmim shumë më të lartë në raport me çmimin e tregut.

Mashtrimi arrin në përvetësimin e 850 milionë euro kursime të këtyre aksionerëve, ku disa humbën të gjitha kursimet e tyre dhe prej dy vitesh po presin daljen në shitje të koleksioneve. /ATA/