![37866853_1987385384626717_6819103920703406080_n](http://jetapress.com/wp-content/uploads/2018/07/37866853_1987385384626717_6819103920703406080_n.jpg)
Seminari dyditor në Beograd, i organizuar nga Rijaseti i Bashkësisë Islame në Serbi dhe Ambasada e Arabisë Saudite, gjatë të martës dhe të mërkurës së 24 e 25 korrikut, i përmbylli punimet me sukses në nivel të ekspertëve rreth aftësisë së mbajtjes së Hytbes.
Seminarin e konsideroi të hapur kryetari i Rijasetit, dr. Sead ef. Nasufoviq dhe dr. Abdul Mexhid El Gajs, atashe për çështjet fetare dhe drejtor i zyrës për çështjet fetare në Ambasadën e Arabisë Saudite, në të cilin ishte i pranishëm edhe Myftiu Nexhmedin ef. Saqipi, z/reis i Rijasetit të BIS në Serbi, së bashku me bashkëpunëtorët e tij.
Jetapress, mëson se në ditën e parë të seminarit u zhvilluan katër seanca me ligjëruesit: Muhamed Ibn Abdulaziz el Matrudi, Hani Ibn Salim el Harisi dhe Sea def. Nasufoviq, të cilët trajtuan disa tema që kishin për qëllim përcaktimin, objektivat dhe të mirat e Hytbes, lloj i fjalimit, rëndësia e informacionit dhe burimet e tjera nga të cilat Hytba është përgatitur.
Seminari i vazhdoi punimet të mërkurën e 25 korrikut me ligjëratat e ekspertëve në fushën e disiplinave shkencore të çështjeve fetare e posaçërisht rreth aftësisë së mbajtjes së Hytbes.
Myftiu Saqipi, gjatë këtij seminari të rëndësishëm pati rasti të bisedoj me atasheun për çështjet fetare dhe drejtorin e zyrës për çështjet fetare në Ambasadën e Arabisë Saudite, dr. Abdul Mexhid El Gajs, pastaj me personalitete të tjera arabe të pranishme të këtij seminari. Në kuadër të këtyre bisedimeve Myftiu Saqipi, i njoftoi bashkëbiseduesit për zhvillimet kulturore dhe fetare të Luginës së Preshevës dhe nevojën e saj për investime në projekte të ndryshme nga bota arabe, të cilët e siguruan Myftiun Saqipi se në një të ardhme jo të largët do ta vizitojnë këtë rajon.
Myftiu i Luginës së Preshevës, Nexhmedin ef. Saqipi i tha jetapress-it se seminari i përmbylli punimet me sukses, duke e llogaritur atë si hapin e parë të bashkëpunimit të Reisetit të Bashkësisë Islame në Serbi me zyrën për çështjet fetare të Mbretërisë së Arabisë Saudite, duke llogaritur shtrirjen e këtij bashkëpunimi të ndërsjellë edhe në Sanxhak dhe Luginë të Preshevës, në fushën e organizimeve të seminareve të kësaj natyre dhe realizimin e projekteve kapitale, njofton jetapress.