![dokufest-780x439](http://jetapress.com/wp-content/uploads/2018/07/dokufest-780x439.jpg)
Edicioni i 17-të i festivalit të filmit që mbahet parvjetshëm në Prizren “ DokuFest”, këtë vit do të mbahet në datat 3-11 gusht.
Drejtoresha e këtij festivali, Nita Deda, në konferencën e parë për media të këtij edicioni, ka shpalosur informacione rreth programit të festivalit që këtë vit trajton si tematikë “Reflektimin”.
“E kemi një program masiv prej 260 filmave, prej performancave të muzikës që sivjet janë në tri skena të ndryshme, ekspozita të fotografisë, paneleve dhe masterklasave, si dhe një numri të madh të njerëzve nga industria e filmit që do të jenë pjesë e festivalit”, ka thënë Deda.
Ajo ka treguar po ashtu që performancat muzikore do të mbahen në tri skena në Prizren: në Marash, Kalanë e Prizrenit dhe në skenën e Lumbardhit.
Ndërsa drejtori artistik i DokuFestit, Veton Nurkollari, ndër të tjerash ka treguar se në këtë edicion do të marrin pjesë 87 regjisore gra.
Samir Karahoda, programer i filmave nacionalë dhe të shkurtër, tha se do të ketë më shumë pjesëmarrje të artistëve shqiptarë dhe do të rritet numri i aktiviteteve për fëmijë. Kurse drejtori ekzekutiv i këtij festivali, Eroll Bilibani ka folur rreth paneleve, debateve dhe punëtorive që do të mbahen në kuadër të DokuFest-it dhe ka thënë se debatet kryesisht do të jenë për zhvillimin e industrisë së filmit dhe sektorit të kulturës.
DokuFest është festival i parvjetshëm ndërkombëtarë i filmit në Kosovë, dhe çdo vit trajton tema të reja varësisht prej aktualitetit dhe nevojës së shoqërive. /KP/