Ushtria izraelite kryen një sulm ajror fatal ndaj karvanit të ndihmave humanitare në Gazë

Forcat e Mbrojtjes së Izraelit (IDF) kanë thënë se kanë kryer një sulm ajror mbi një autokolonë ndihmash humanitare në Gazë, që kishte në shënjestër “sulmuesit e armatosur” që përpiqeshin ta rrëmbenin atë, por organizata bamirëse që organizoi ndihmën tha se njerëzit e vrarë në sulm ishin punonjës të kompanisë së transportit që ishte duke punuar me ta.

Karvani, i organizuar nga OJQ-ja Anera me bazë në SHBA, po transportonte pajisje mjekësore dhe karburant në një spital të drejtuar nga Emiratet në Rafah të enjten në mbrëmje në kohën e sulmit. Rruga e saj ishte koordinuar paraprakisht me IDF-në, nën një proces që synonte të parandalonte bombardimin e automjeteve të ndihmës, shkruan The Guardian, transmeton gazeta Express.

Drejtoresha e Anera-s në Palestinë, Sandra Rasheed, tha: “Ky është një incident tronditës. Kolona, ëe cila ishte e koordinuar nga Anera dhe e miratuar nga autoritetet izraelite, përfshinte një punonjës të Anera-s, i cili për fat të mirë mbeti i padëmtuar”.

“Tragjikisht, disa individë, të gjithë të punësuar nga kompania e transportit me të cilën punojmë, u vranë në sulm. Ata ishin në automjetin e parë të kolonës”.

Raportet e pakonfirmuara nga Gaza thanë se pesë persona u vranë në sulmin ajror.

Një deklaratë e IDF-së konfirmoi se rruga ishte e koordinuar, por pretendonte se “gjatë lëvizjes së kolonës, një numër sulmuesish të armatosur kapën kontrollin e automjetit në pjesën e përparme të autokolonës (një Jeep) dhe filluan ta udhëheqin atë”.https://zeri.info/inarticle.html

“Në automjetet e tjera të autokolonës nuk u shkaktuan dëme dhe ajo arriti në destinacionin e saj siç ishte planifikuar. Sulmi ndaj sulmuesve të armatosur hoqi kërcënimin që ata të merrnin kontrollin mbi kolonën humanitare”.

IDF-ja pretendoi se kishte kontaktuar Anerën pas incidentit dhe se organizata e ndihmës kishte “verifikuar se të gjithë anëtarët e organizatës së kolonës dhe ndihma humanitare ishin të sigurt dhe arritën në destinacionin e tyre siç ishte planifikuar”.

Anera konfirmoi se autokolona arriti në spital, por tha se vetëm një person që udhëtonte në kolonë ishte një punonjës i Anera-s. Pjesa tjetër punonte për kompaninë e saj partnere të transportit, e cila nuk u identifikua.

“Ne po kërkojmë urgjentisht detaje të mëtejshme rreth asaj që ndodhi”, tha Rasheedi.

Sulmi ajror në kolonë erdhi disa orë pasi ushtarët izraelitë hapën zjarr ndaj një automjeti të Programit Botëror të Ushqimit (WFP) të shënuar qartë me shenjat e OKB-së, duke udhëtuar në një kolonë prej dy personash.