Ballina Aktuale BASHKËSIA SHQIPTARE NË BOSNJE DHE HERCEGOVINË INTENSIFIKON AKTIVITETET KULTURORE E PËRKUJTIMORE NË...

BASHKËSIA SHQIPTARE NË BOSNJE DHE HERCEGOVINË INTENSIFIKON AKTIVITETET KULTURORE E PËRKUJTIMORE NË SARAJEVË

SHPËRNDAJE

Bashkësia Shqiptare në Bosnje dhe Hercegovinë, nën udhëheqjen e kryetares së saj Elvira Dushi, po vazhdon me përkushtim dhe vizion rrugën e hapur ndër vite, duke organizuar aktivitete të rëndësishme kulturore, përkujtimore dhe kombëtare në Sarajevë.

Në këtë kuadër, Bashkësia Shqiptare në BeH njofton se më 15 shkurt, në Sarajevë, do të organizohet shënimi solemn i përvjetorit të shpalljes së Pavarësisë së Republikës së Kosovës, një ngjarje me rëndësi të veçantë për komunitetin shqiptar, por edhe për miqtë e Kosovës dhe shqiptarëve në Bosnje dhe Hercegovinë.

Aktiviteti do të nisë me hapjen solemne të ekspozitës fotografike të anëtarit të ri të Bashkësisë Shqiptare, Din Hreliqi, e cila pritet të sjellë një dimension artistik dhe reflektues mbi identitetin, kujtesën dhe përkatësinë kulturore. Programi do të vazhdojë me një koncert të veçantë të një kvarteti me violina, i cili do të interpretojë vepra të kompozitorëve shqiptarë, me një kohëzgjatje rreth 35 minuta, duke i dhënë mbrëmjes një frymë të lartë artistike dhe emocionale.

Gjatë kësaj ngjarjeje do të bëhet edhe ndarja e disa mirënjohjeve për individë që kanë dhënë kontribut të veçantë në veprimtarinë dhe zhvillimin e Bashkësisë Shqiptare në Bosnje dhe Hercegovinë, si shenjë respekti dhe vlerësimi institucional.

Në këtë manifestim janë të ftuar përfaqësues të qeverisë lokale, profesorë universitarë, ambasadorë, intelektualë, anëtarë të Bashkësisë Shqiptare, si dhe miq e dashamirë të komunitetit shqiptar në BeH. Prezencën e tij e ka konfirmuar edhe Ambasadori i Republikës së Kosovës në Zagreb, ndërsa po shqyrtohet mundësia që ngjarjes t’i drejtohet me një mesazh përshëndetës Kryeministri i Republikës së Kosovës, në dy gjuhë, ashtu siç ka vepruar edhe me rastin e shënimit të 15-vjetorit të Pavarësisë.

Bashkësia Shqiptare në Bosnje dhe Hercegovinë bën të ditur se për këtë aktivitet do të njoftohen mediat lokale dhe rajonale, me qëllim që mesazhi i unitetit, kulturës dhe kujtesës historike të arrijë tek një audiencë sa më e gjerë.

Ndërkohë, një tjetër aktivitet me peshë të madhe historike dhe emocionale është planifikuar të mbahet më 16 prill, kur pritet organizimi i një tubimi të madh me shqiptarët që morën pjesë në Luftën e Bosnjës. Ky tubim synon jo vetëm nderimin e të rënëve, por edhe bashkimin e dëshmitarëve të gjallë të asaj periudhe, për të mos lejuar që sakrifica e shqiptarëve në Bosnje të mbetet në heshtje apo të mbulohet nga harresa.

Kjo nismë përfaqëson një hap të rëndësishëm drejt drejtësisë morale, dokumentimit historik dhe respektit për jetët e humbura, duke dëshmuar se kujtesa kolektive nuk është vetëm një e drejtë, por një detyrim njerëzor dhe kombëtar./Jetapress/