Ballina Aktuale Kur largësia na mëson sa shumë e duam atdheun

Kur largësia na mëson sa shumë e duam atdheun

SHPËRNDAJE

Nga Sureja Saqipi


Ka një ndjenjë që e kupton vetëm ai që studion larg vendlindjes: një boshllëk i heshtur që nuk e mbush asgjë. As qyteti i ri, as ritmi i përditshëm, as gjuha e huaj. Sepse vendlindja dhe gjuha amtare nuk janë thjesht hapësira gjeografike apo mjete komunikimi, por pjesë e identitetit dhe e shpirtit tonë. Vetëm kur largohemi, e kuptojmë sa thellë e duam atdheun dhe njerëzit tanë.
Largësia të mëson shumë. Të mëson ta çmosh fjalën shqip, kujtimet, zakonet, familjen dhe rrënjët. Të bën të ndjesh mungesën e gjërave që dikur i merrje si të mirëqena. Atdheu fillon të jetojë brenda teje më fort se kurrë më parë.
Allahu i shpërbleftë të gjithë ata që kanë dhënë nga vetja për shoqërinë tonë, veçanërisht në fushën e edukimit dhe arsimit. Falë tyre, shumë të rinj kanë pasur mundësinë të hapin horizonte të reja dhe të ndërtojnë veten përmes dijes. Por sot, me dhimbje, shohim se një pjesë e madhe e rinisë, për shkak të vështirësive politiko-ekonomike dhe nënvlerësimit të arsimit, po heq dorë nga studimet dhe po zgjedh mërgimin si zgjidhje të vetme.
Ky realitet nuk duhet të na lërë indiferentë. Shoqëria që humb rininë e saj, humb të ardhmen. Arsimi nuk është luks, por domosdoshmëri; nuk është barrë, por investimi më i sigurt për një shoqëri të qëndrueshme dhe dinjitoze.
Megjithatë, shpresa nuk duhet të shuhet. Mbetet në dorën tonë që dritën e ndezur nga gjeneratat para nesh të mos e shuajmë, por ta bëjmë edhe më të fortë, edhe më të ndritshme. Të kthejmë dijen në vlerë, atdheun në përgjegjësi dhe largësinë jo në harresë, por në motiv për t’u kthyer më të vetëdijshëm dhe më të përgatitur.
Sepse atdheu nuk është vetëm vendi ku lindim, por vendi që e mbajmë gjallë me mendje, me zemër dhe me vepra.