Ballina Aktuale 30 MILIONË DINARË PËR KULTURËN E PAKICAVE KOMBËTARE

30 MILIONË DINARË PËR KULTURËN E PAKICAVE KOMBËTARE

SHPËRNDAJE

Ministri Demo Berisha nënshkruan marrëveshjet për financimin e projekteve që synojnë forcimin e tolerancës, barazisë dhe bashkëjetesës në Serbi

Ministri për të Drejtat e Njeriut dhe të Pakicave dhe Dialogun Shoqëror, Demo Berisha, ka nënshkruar sot në Pallatin e Serbisë marrëveshjet për ndarjen e mjeteve financiare me përfaqësuesit e organizatave, programet dhe projektet e të cilave janë përzgjedhur në kuadër të konkursit për financim nga Fondi Buxhetor për Pakicat Kombëtare për vitin 2026.

Për këtë qëllim janë siguruar mjete në vlerë prej 30 milionë dinarësh, të dedikuara për programe dhe projekte në fushën e kulturës, të cilat kanë për synim avancimin, ruajtjen dhe forcimin e dialogut ndërkulturor, tolerancës dhe mirëkuptimit ndërmjet komuniteteve të ndryshme që jetojnë në Republikën e Serbisë.

Duke iu drejtuar të pranishmëve gjatë ceremonisë së nënshkrimit, ministri Berisha theksoi se Ministria për të Drejtat e Njeriut dhe të Pakicave dhe Dialogun Shoqëror mbetet e përkushtuar në krijimin e kushteve që çdo komunitet kombëtar të ketë mundësi të ruajë dhe zhvillojë gjuhën, traditën, zakonet dhe trashëgiminë e vet kulturore.

“Kultura është hapësira ku më së miri shfaqet pasuria e diversitetit tonë. Prandaj është e rëndësishme të vazhdojmë të mbështesim programe që ruajnë identitetin e pakicave kombëtare, por njëkohësisht nxisin bashkëpunimin, njohjen dhe mirëkuptimin reciprok. Vetëm një shoqëri që kujdeset për larminë e saj mund të jetë vërtet e fuqishme, stabile dhe e orientuar drejt së ardhmes”, ka deklaruar ministri Berisha.

Ai ka theksuar se ministria që drejton do të vazhdojë të përmirësojë bashkëpunimin me këshillat kombëtare të pakicave, organizatat joqeveritare dhe të gjithë aktorët relevantë, me qëllim që përmes projekteve konkrete të forcohen kapacitetet për ruajtjen e trashëgimisë kulturore dhe zhvillimin e dialogut ndërkulturor në të gjithë territorin e Serbisë.

“Detyra jonë është që të gjithë qytetarëve t’u sigurojmë mundësi të barabarta për ruajtjen e identitetit të tyre dhe pjesëmarrjen aktive në jetën shoqërore. Do të vazhdojmë të udhëheqim politika që lidhin njerëzit, forcojnë besimin dhe ndërtojnë një shoqëri ku dallimet shihen si vlerë e jo si ndarje”, ka thënë Berisha.

Sipas tij, pikërisht këto projekte dëshmojnë se përmes punës së përbashkët mund të arrihet një nivel më i lartë i tolerancës, respektit dhe bashkëjetesës ndërmjet komuniteteve të ndryshme.

Mbështetje edhe për përmirësimin e pozitës së komunitetit rom

Krahas projekteve të mbështetura nga Fondi Buxhetor për Pakicat Kombëtare, ministri Berisha ka nënshkruar gjithashtu marrëveshje me përfaqësues të organizatave të shoqërisë civile, projektet e të cilave janë përzgjedhur në kuadër të konkursit publik “Parandalimi i diskriminimit dhe dhunës ndaj romëve”.

Ky program synon të mbështesë iniciativat që kontribuojnë në përmirësimin e pozitës së komunitetit rom dhe ndërtimin e një shoqërie të bazuar në të drejta të barabarta, respekt reciprok dhe solidaritet.

“Investimi në mundësi të barabarta, arsim, mirëkuptim dhe respekt të ndërsjellë është investimi më i mirë në të ardhmen e vendit tonë. Vetëm përmes bashkëpunimit të institucioneve shtetërore, pushteteve lokale dhe organizatave të shoqërisë civile mund të ndërtojmë një Serbi ku dallimet konsiderohen pasuri dhe jo arsye për diskriminim”, ka deklaruar ministri Berisha.

Me nënshkrimin e këtyre marrëveshjeve fillon realizimi i projekteve që do të zhvillohen në pjesë të ndryshme të Republikës së Serbisë, me qëllim forcimin e përfshirjes sociale, përmirësimin e pozitës së romëve dhe krijimin e një mjedisi ku të drejtat e njeriut, barazia dhe dinjiteti i çdo individi do të jenë baza e zhvillimit shoqëror.

Mbështetja institucionale për kulturën dhe identitetin e komuniteteve kombëtare paraqet një hap të rëndësishëm drejt ndërtimit të një shoqërie më gjithëpërfshirëse, ku diversiteti kulturor shihet si një vlerë e përbashkët dhe një mundësi për bashkëpunim e zhvillim./Jetapress/