Ballina Aktuale Besimi nuk është problemi – manipulimi politik është!

Besimi nuk është problemi – manipulimi politik është!

SHPËRNDAJE

Kur feja përdoret për interesa politike, humbin qytetarët, dobësohet shteti dhe cenohet liria.

Nga Nexhmedin Saqipi

Në shoqëritë demokratike, liria e besimit nuk është vetëm një e drejtë fetare, por edhe një e drejtë themelore njerëzore dhe kushtetuese. Ky parim nuk është vetëm vlerë e qytetërimit modern; ai është shpallur qartë në Kur’an më shumë se katërmbëdhjetë shekuj më parë.
All-llahu i Madhëruar thotë:
“Dhe thuaj: ‘E vërteta është nga Zoti juaj. Kush të dojë, le të besojë, e kush të dojë, le të mohojë…'” (El-Kehf, 18:29).
Ky ajet e vendos njeriun përballë përgjegjësisë së tij. Besimi nuk ndërtohet me detyrim, por me bindje të lirë. Askush nuk ka të drejtë ta imponojë fenë, ta përndjekë apo ta gjykojë tjetrin për bindjen e tij. Ne, si besimtarë myslimanë, nuk kemi çfarë t’i shtojmë këtij parimi hyjnor. Detyra jonë është ta paraqesim të vërtetën me urtësi, argument dhe shembull të mirë.
Njeriu është i lirë të zgjedhë rrugën e tij, por është edhe përgjegjës para Zotit dhe para ligjit për veprimet e tij. Besimi është marrëdhënie ndërmjet njeriut dhe Krijuesit, ndërsa rendi publik është përgjegjësi e institucioneve të shtetit.
Liria e besimit dhe liria e shprehjes janë të drejta që mbrohen edhe nga ligji. Çdo qytetar ka të drejtë të besojë ose të mos besojë. Ndërsa shteti ka detyrimin të mbikëqyrë zbatimin e ligjit dhe funksionimin e bashkësive fetare. Nëse një individ apo organizatë shkel ligjin, cenon sigurinë ose rendin publik, atëherë duhet të reagojnë organet kompetente. Drejtësia nuk mund t’u lihet turmës, shpifjeve, propagandës apo gjykimeve në rrjetet sociale.
Këtë qëndrim e kam shprehur prej vitesh edhe për shoqatat dhe lëvizjet me agjenda të ndryshme fetare që janë shfaqur në Ballkan pas viteve 2000. Çdo veprim duhet të vlerësohet mbi bazën e ligjit, fakteve dhe përgjegjësisë, jo sipas emocioneve, paragjykimeve apo interesave politike.
Fatkeqësisht, përvoja na tregon se temat fetare shpesh aktivizohen pikërisht atëherë kur politika kërkon të largojë vëmendjen e qytetarëve nga problemet që rëndojnë jetën e tyre: drejtësia, korrupsioni, papunësia, varfëria, arsimi, shëndetësia dhe mirëqenia. Nëpërmjet mediave dhe rrjeteve sociale krijohen debate të panevojshme dhe përçarëse, ndërsa problemet e vërteta mbeten pa zgjidhje.
Besimi nuk ka qenë kurrë armik i shoqërisë. Përkundrazi, besimi i sinqertë në Zotin e udhëzon njeriun drejt moralit, drejtësisë, paqes dhe përgjegjësisë. Problemi lind kur feja përdoret si instrument për interesa politike, kur manipulohet opinioni publik dhe kur përçarja shndërrohet në mjet për përfitime të ngushta.
Shoqëria nuk ndërtohet mbi propagandën, por mbi drejtësinë. Nuk ndërtohet mbi urrejtjen, por mbi respektin. Nuk ndërtohet mbi manipulimin, por mbi të vërtetën.
Në fund, duhet ta kuptojmë se bota ka nevojë për të vërtetën, jo për manipulimin. E vërteta nuk ka nevojë për mbrojtës me zhurmë, por për njerëz me ndërgjegje, integritet dhe përgjegjësi. Bota nuk ndërtohet mbi urrejtjen, propagandën dhe përçarjen, por mbi drejtësinë, lirinë, respektin për ligjin dhe dinjitetin e njeriut.
Besimi i sinqertë nuk është burim konflikti, por burim paqeje, morali dhe përgjegjësie. Vetëm një shoqëri që respekton lirinë e ndërgjegjes, sundimin e ligjit dhe të vërtetën mund të ndërtojë një të ardhme të sigurt, në shërbim të njeriut dhe për lavdinë e Krijuesit.
Sepse besimi nuk është problemi. Problemi është manipulimi i besimit për interesa politike. Aty ku mbizotërojnë drejtësia, e vërteta dhe liria, aty ndërtohen paqja, besimi dhe shpresa për të ardhmen.