Ballina Aktuale SAQIPI: LARG PËRÇARJEVE DHE ALARMIMEVE  POLITIKE NË LUGINË TË PRESHEVËS

SAQIPI: LARG PËRÇARJEVE DHE ALARMIMEVE  POLITIKE NË LUGINË TË PRESHEVËS

SHPËRNDAJE

Reagim

Bujanoc, 29 gusht 2026 – Presidenti i Kosovës, Albin Kurti, ka zhvilluar një takim me përfaqësues të jetës politike, institucionale dhe kulturore të shqiptarëve të Luginës së Preshevës, me qëllim diskutimin e problemeve dhe sfidave me të cilat përballet kjo pjesë e shqiptarëve.

Kryetari i shoqërisë civile nga Lugina e Preshevës, Nexhmedin Saqipi, vlerëson se çështjet e shqiptarëve duhet të trajtohen mbi bazën e përgjegjësisë institucionale, dialogut dhe bashkëpunimit, para së gjithash me institucionet e Republikës së Serbisë, ku shqiptarët e Luginës jetojnë dhe ushtrojnë të drejtat e tyre qytetare.

Sipas Saqipit, Kosova duhet t’i dëgjojë shqetësimet e shqiptarëve të Luginës, por njëkohësisht të jetë e kujdesshme ndaj retorikës alarmuese dhe skenarëve që mund të prodhojnë frikë, pasiguri dhe përçarje.

“Luginës së Preshevës i duhet më shumë dialog dhe më pak alarm. Problemet tona janë reale dhe serioze, por ato nuk zgjidhen duke i dramatizuar, por duke i adresuar përmes institucioneve dhe mjeteve demokratike”, thekson Saqipi.

Ai konsideron se në prag të zgjedhjeve parlamentare dhe presidenciale në Serbi, takimi në Prishtinë mund të shihet edhe si një lëvizje me karakter paraelektoral, përmes së cilës synohet mobilizimi i faktorit politik shqiptar në Luginë dhe krijimi i një klime të favorshme për organizatorin.

“Shqiptarët e Luginës duhet të jenë të bashkuar rreth interesave të tyre, por jo të përdoren si instrument elektoral. Prioritet duhet të jetë sigurimi i përfaqësimit real dhe të qëndrueshëm politik në institucionet e Serbisë, përfshirë sigurimin e së paku një deputeti shqiptar në Kuvendin e Republikës së Serbisë”, shprehet Saqipi.

Ai apelon që përfaqësimi politik i shqiptarëve të mos ndërtohet mbi frikë, alarmime apo interesa të ngushta partiake, por mbi një platformë të përbashkët, transparencë, përgjegjësi dhe bashkëpunim institucional.

“Lugina ka nevojë për stabilitet, zhvillim ekonomik, të drejta të garantuara dhe përfaqësim politik dinjitoz. Në vend të alarmit, duhet të ndërtojmë një strategji të përbashkët politike dhe institucionale”, përfundon Saqipi.

Njofton Qendra për Informim e Shoqatës së Gazetarëve “Etika” – Bujanoc