![13151977_1165250873506843_7931195564176399651_n](http://jetapress.com/wp-content/uploads/2018/06/13151977_1165250873506843_7931195564176399651_n.jpg)
Lajmi i hidhur për vdekjen e papritur të legjendës së futbollit shqiptar, Fadil Vokrri, ish kryetari i Federatës së Futbollit të Kosovës, mbushi pikëllim gjithë shqiptarët kudo qofshin ata, këndej e matanë Drinit, duke llogaritur edhe ata në diasporë e përtej Atlantikut.
Shqiptarët e Luginës së Preshevës, të ndjerin, dritë pastë, Fadil Vokrrin, e kanë pasur idol të futbollit, qoftë si lojtar fushe, qoftë edhe si drejtues të Federatës së Futbollit kosovar.
Shumë tifozë të kësaj Lugine, dikur nëpër stadiumet ish Jugosllave, mbushnin stadiumet, kurdo që adhuruesi i tyre Fadil Vokrri, merrte pjesë dhe tregonte shkathtësinë e një lojtari të përkryer.
Jetapress, shkëput një deklaratë nga Myftiu i Luginës së Preshevës, Nexhmedin ef. Saqipi, i cili e ka njohur nga afër të ndjerin Fadil Vokrri, duke e vlerësuar atë si “Maradona” shqiptare, i cili do të mbetet “ikona” e futbollit shqiptar.
“Historia e futbollit shqiptar ka dhënë një sportist të madh siç ishte Fadil Vokrri. Njerëzit që lënë gjurmë në histori, mbeten të pavdekshëm, ndërsa vdekja e natyrshme është krenari që ta përmbyll me nder historinë e suksesit me një mesazh të madh jetësor. Ne do ta kujtojmë për jetë e mot, duke i shpreh ngushëllime familjarëve, kolegëve dhe miqve të tij, gjithkund e gjithkah, me lutjet në prag të këtij muaji të madh të agjërimit e festës së Bajramit: u preftë në paqe e Zoti e shpërbleftë me Xhehnet”, theksoi Myftiu Saqipi për portalin Jetapress.