In memoriam
Shkruan: Prof. dr. Bahtijar Kryeziu
Më 8 prill vdiq, në moshën 81 vjeçare dhe u varros në varrezat e Prishtinës
njëri ndër pishtarët e arsimit shqip në Kosovë, pedagogu i shquar dhe profesori
shumëvjeçar universitar, prof.dr. Dali Emërllahu.
Profesor Daliu ishte njëri ndër intelektualët e parë të Malësisë së Bujanocit
dhe doktori i parë i kësaj ane.
Lindi më 2 shtator 1938 në Breznicë të Bujanocit, ku edhe mori mësimet e para.
Gjimnazin e ulët e kreu në Muçivërc të Dardanës (ish-Kamenicës), Shkollën
Normale e mbaroi në Prishtinë (1957), ndërkaq Fakultetin Filozofik – Dega e
Pedagogjisë e kreu në Shkup (1963). Pas kryerjes së studimeve, një vit shkollor
punoi profesor i lëndëve pedagogjike në Shkollën normale “Zenel
Hajdini” të Ferizajt e pastaj, pas shërbimit ushtarak (1964-‘65), tri vjet
punoi profesor në Shkollën Normale të Prishtinës. Që në vitin shkollor 1968/’69
u zgjodh ligjërues në marrëdhënie të rregullt pune në Shkollën e Lartë
Pedagogjike të Prishtinës për lëndët mësimore: Pedagogji dhe Metodikë e
edukatës politeknike. Në vitin 1974 u përparua në titullin e profesorit të
shkollës së lartë pedagogjike për lëndët e përmendura.
Me hapjen e Fakultetit (Akademisë) të Arteve në UP, në vitin akademik 1974//75,
u angazhua mësimdhënës edhe në këtë fakultet për lëndën Pedagogji, të cilën
lëndë, përveç një pushimi të shkurtër gjatë përgatitjes së doktoratës, e
ligjëroi në vazhdimësi. Gjithashtu, me themelimin e akademive pedagogjike në
Prizren dhe në Gjilan, lëgjiroi lëndën e Metodikës së edukatës politeknike.
Pas miratimit të tezës së doktoratës në Fakultetin Filozofik të Prishtinës, më
1977, me titull: “Sendërtimet dhe perspektiva e edukatës dhe e arsimit
punues e politeknik” (“Ostvarivanja i perspektive radnog i politekničkog
vaspitanja i obrazovanja”, atë e mbrojti me sukses në tetor të vitit 1983.
Në konkursin e shpallur të Fakultetit të Kulturës Fizike të UP-së, më 1987, u
zgjodh docentit (bashkëpunëtor i jashtëm) për lëndën e Pedagogjisë dhe në saje
të konkursit të shpallur, më 1995, përparohet në titullin e profesorit
inordinar (në cilësinë e bashkëpunëtorit të jashtëm) për lëndën e cekur.
Me hapjen e Fakultetit të Mësuesisë në Universitetin e Prishtinës, u zgjodh,
përkatësisht u rizgjodh profesor inordinar (bashkëpunëtor i këtij fakulteti)
për lëndët mësimore: Pedagogji e përgjithshme I dhe II, kurse që nga 1.10.1998
krijoi marrëdhënie të rregullt pune në këtë fakultet, ku ushtroi punën e
profesorit deri në mbylljsen e atij fakulteti.
Prof. dr. Dali Emërllahu, përveç punës në procesin edukativo-arsimor me
studentë, ushtroi edhe detyra të tjera të rëndësishme shoqërore e profesionale,
ndër të cilat ishte edhe zëvendësdrejtor i SHLP-së në Prishtinë (1973-1975);
shef i Degës së Politeknikës (1975-1977; 1983-1987; 1993-1995); zëvendësrektor
i Univeristetit të Prishtinës (1989-1991); kryetar i Këshillit koordinues për
mëvetësimin e Universitetit të Prishtinës (1991); zëvendësrektor i
Universitetit (të mëvetësishëm me mësim në gjuhën shqipe) të Prishtinës
(1991-1992); anëtar i Komisionit për reformimin e planeve e programeve mësimore
në UP, prej vitit 1994; pastaj kryetar i Këshillit botues të revistës
“Shkëndija” në Prishtinë; kryetar i Këshillit botues të revistës
“BAT”; redaktor (në cilësinë e bashkëpunëtorit të jashtëm) për
tekstet mësimore në lëmin e edukatës punuese në ETMM të Kosovës; bashkëpunëtor
profesional për shumë emisione edukativo-arsimore të Radio Prishtinës dhe TV
Prishtinës etj.
Profesor Emërllahu, krahas të gjitha këtyre zotimeve, si preokupim të
përhershëm kishte punën profesionale – shkencore, si në botimin e mbi 200
njësive bibliografike (te “Shkëndija”, “Fjala”, “Bota
e re”, “Përparimi”, “Dituria”, “Libri
shkollor”, “Rilindja”, “Jedinstvo”,
“Pedagogu” i Prishtinës, në “Përmbledhje punimesh” të
SHLP-së të Prishtinës, të SHLP-së “Skënderbeu” të Gjilanit, në
revistën “Acta kineziologica” të Fakultetit të Kulturës Fizike të
UP-së etj.), ashtu edhe në botimin e disa teksteve universitare, në
pjesëmarrjen me kumtesa në shumë këshillime e simpoziume shkencore të
karakterit edhe ndërkombëtar, në përkthimin (nga serbokroatishtja ose edhe kroatoserbishtja)
e disa veprave profesionale, në vlerësimin e disa teksteve shkollore e
universitare etj.(Nga një punim më i zgjeruar)/Jetapress/
