Ballina Lajme Nga Vendi KOMANDANT BALA – NJË HERO I KAUZËS KOMBËTARE

KOMANDANT BALA – NJË HERO I KAUZËS KOMBËTARE

SHPËRNDAJE

In memoriam:

Lajmi për ndarjen nga jeta të Komandant Balës, alias Bajram Arfi, nga Komuna e Bujanocit, ka prekur thellë zemrat e të gjithë atyre që e njohën si një hero të paepur të kauzës kombëtare dhe një shembull të devotshmërisë për lirinë dhe të drejtat e shqiptarëve në Preshevë, Bujanoc dhe Medvegjë.

Komandant Bala ishte njëri nga figurat emblematike të ish-Ushtrisë Çlirimtare për Preshevë, Bujanoc dhe Medvegjë (UÇPMB), duke udhëhequr me guxim dhe përkushtim gjatë kohërave të vështira të konfliktit të armatosur. Gjatë këtyre përleshjeve të ashpra, ai u plagos në një betejë heroike kundër forcave paramilitare serbe, duke dëshmuar sakrificën e tij për lirinë e kombit shqiptar.

Pas përfundimit të konflikteve, sfidat e tij nuk përfunduan. Komandant Bala përjetoi humbjen e shtëpisë së tij në Turi të Bujanocit, e cila u dogj nga forcat serbe. Përballë këtyre fatkeqësive, ai u detyrua të zhvendoset në Gjilan, ku vazhdoi të kontribuonte për çështjen kombëtare me po të njëjtin zell dhe përkushtim.

Përtej rolit të tij ushtarak, Bajram Arfi u shqua si një aktivist i palodhur, i cili i qëndroi gjithmonë besnik idealeve të tij për një të ardhme më të mirë për shqiptarët e Luginës së Preshevës dhe përtej saj. Emri i tij mbetet i shkruar me germa të arta në historinë e përpjekjeve për liri dhe dinjitet kombëtar.

Komandant Bala do të kujtohet gjithmonë si një simbol i guximit, sakrificës dhe përkushtimit ndaj atdheut. Lamtumira e tij lë pas një zbrazëti të madhe, por edhe një trashëgimi të pavdekshme frymëzimi për brezat që vijnë.

Pushofsh në paqe, Komandant Bala! Lavdi jetës dhe veprës suaj!

Nga redaksia e Jetapress-it

Rejhane Rexhepi