Ballina Aktuale URIMI ME RASTIN E FESTËS SË KURBAN BAJRAMIT

URIMI ME RASTIN E FESTËS SË KURBAN BAJRAMIT

SHPËRNDAJE

Nga Reisu-l-Ulema, Haxhi Nexhmedin ef. Saqipi, i cili këto ditë ndodhet në Haxh, si mysafir i Mbretit të Arabisë Saudite:
Të nderuar besimtarë,
Me rastin e festës së Kurban Bajramit, kam nderin dhe kënaqësinë e veçantë që, në emër të Rijasetit të Bashkësisë Islame të Serbisë dhe në emrin tim personal, t’ju përcjell urimet më të përzemërta, duke ju dëshiruar që kjo festë e madhe t’ju gjejë me shëndet, paqe, harmoni dhe begati në familjet tuaja.
Kurban Bajrami është një nga ditët më të bekuara të kalendarit islam, e lidhur ngushtë me adhurimin madhështor të Haxhit dhe me qëndrimin në Arafat – vendin ku miliona besimtarë nga e gjithë bota bashkohen në lutje, përulësi dhe kërkim faljeje para Krijuesit. Arafati na kujton barazinë mes njerëzve, pastërtinë e zemrës dhe nevojën që gjithmonë t’i rikthehemi vlerave të paqes, drejtësisë, mëshirës dhe solidaritetit njerëzor.
Në këto ditë feste kemi nevojë më shumë se kurrë të ruajmë traditat tona më të mira, të forcojmë familjen si shtyllë të shoqërisë dhe të kultivojmë dashurinë, respektin dhe kujdesin për njëri-tjetrin. Bajrami është festë që bashkon zemrat, afron gjeneratat dhe rikthen ndjenjën e mirësisë, faljes dhe mirëkuptimit mes njerëzve.
Ruajtja e vlerave morale, edukimi shpirtëror, përgjegjësia ndaj vetes dhe shoqërisë, paqja e brendshme, ndihma ndaj tjetrit dhe respekti i ndërsjellë janë virtyte që e lartësojnë besimtarin dhe e bëjnë më të fortë shoqërinë tonë.
Fatkeqësisht, po jetojmë në një kohë të trazuar, kur në shumë vende të botës luftërat, konfliktet dhe padrejtësitë vazhdojnë të marrin jetë të pafajshme. Fëmijë, gra, pleq dhe civilë të pambrojtur po vuajnë pasojat e interesave politike e gjeostrategjike, duke rënduar ndërgjegjen e njerëzimit. Në vend të paqes e humanizmit, shpesh po mbizotërojnë urrejtja, dhuna dhe padrejtësia.
Prandaj, në këtë festë të madhe të sakrificës dhe reflektimit, mesazhi i Kurban Bajramit bëhet edhe më i fuqishëm: të zgjedhim paqen para urrejtjes, dialogun para konfliktit dhe humanizmin para çdo interesi që cenon dinjitetin e njeriut. Kjo festë na fton të mos heshtim përballë padrejtësisë, por të lutemi dhe të punojmë për një botë më të drejtë, më të sigurt dhe më njerëzore për të gjithë.
Në këtë ditë të bekuar, lusim Allahun e Madhëruar t’i pranojë lutjet, ibadetet, kurbanët dhe veprat tona të mira, të sjellë qetësi në zemrat tona, harmoni në familjet tona dhe mëshirë e shpresë për mbarë njerëzimin.
Me fat dhe të begatë festa e Kurban Bajramit!
Reisu-l-Ulema Haxhi Nexhmedin ef. Saqipi