Ballina Aktuale LUGINA E PRESHEVËS: DY PALË ZGJEDHJE, DY REALITETE TË VOTIMIT – KU...

LUGINA E PRESHEVËS: DY PALË ZGJEDHJE, DY REALITETE TË VOTIMIT – KU MBETËN MBI 12 MIJË VOTUES SHQIPTARË?

SHPËRNDAJE

Nga Shoqëria Civile

Rezultatet preliminare të zgjedhjeve për Këshillin Kombëtar Shqiptar në Serbi kanë hapur një debat të rëndësishëm mbi pjesëmarrjen e qytetarëve, besueshmërinë e procesit zgjedhor dhe dallimet e mëdha të votimit ndërmjet zgjedhjeve parlamentare dhe atyre për përfaqësimin nacional të shqiptarëve në Luginën e Preshevës.

Sipas shifrave të paraqitura, në zgjedhjet për Këshillin Kombëtar Shqiptar kanë votuar 14.622 qytetarë, nga gjithsej 37.759 votues të regjistruar në Listën e Posaçme Zgjedhore. Kjo përfaqëson rreth 38,7 për qind të votuesve të regjistruar.

Ndërkaq, sipas të dhënave të paraqitura për zgjedhjet parlamentare të Serbisë, të mbajtura më 25 tetor 2026, kanë votuar 26.783 qytetarë. Pra, kemi një dallim prej 12.161 votuesish ndërmjet dy proceseve zgjedhore.

Ky dallim ngre një pyetje që kërkon përgjigje: A u mobilizuan qytetarët për zgjedhjet parlamentare, ndërsa për zgjedhjen e përfaqësuesve të tyre nacionalë një pjesë e konsiderueshme e tyre mbetën jashtë procesit?

Dobrosini mbi 800 vota, 91 për Këshillin Kombëtar – Zarbica mbi 600 vota, vetëm 31!

Dallimet bëhen edhe më domethënëse kur shikohen rezultatet në vendvotime të caktuara. Sipas të dhënave të paraqitura, në Dobrosin, në zgjedhjet parlamentare janë regjistruar mbi 800 vota, ndërsa në zgjedhjet për Këshillin Kombëtar Shqiptar vetëm 91. Në Zarbicë, përkatësisht, mbi 600 vota në zgjedhjet parlamentare dhe vetëm 31 në ato për Këshillin Kombëtar.

Këto shifra, nëse konfirmohen nga procesverbalet zyrtare të të dy proceseve, kërkojnë një analizë serioze. Si shpjegohet një dallim kaq i madh në pjesëmarrje në të njëjtat vendbanime? A kemi të bëjmë me mungesë mobilizimi qytetar, me probleme të listave zgjedhore, me bojkot të heshtur apo me mënyrën se si është organizuar dhe menaxhuar procesi zgjedhor?

Në Preshevë, ndërkohë, janë ngritur edhe vërejtje lidhur me listat zgjedhore, çështje që meriton të trajtohet me transparencë dhe të sqarohet nga organet kompetente.

Natyrisht, duhet pasur parasysh se zgjedhjet parlamentare dhe ato për Këshillin Kombëtar zhvillohen mbi dy lista të ndryshme zgjedhore. Prandaj, diferenca prej 12.161 votuesish nuk mund të interpretohet automatikisht si numër i qytetarëve që kanë abstenuar, por është një tregues që kërkon krahasim të kujdesshëm të të dhënave për secilin vendvotim.

Fitoret e mëdha dhe pyetjet që mbeten pa përgjigje

Sa shumë gëzime, sa shumë fitore! Fitore në Parlamentin e Serbisë, fitore në Këshillin Kombëtar Shqiptar, fitore ndaj kundërshtarëve politikë shqiptarë! Duket sikur disa aktorë politikë kanë gjetur formulën e përhershme për të festuar, pavarësisht se çfarë ndodh me përfaqësimin real të qytetarëve.

Për më shumë se tri dekada, Partia për Veprim Demokratik (PVD) dhe strukturat e saj politike kanë qenë pjesë e proceseve zgjedhore dhe institucionale në Luginën e Preshevës. Gjatë kësaj periudhe, çështja e të drejtave kombëtare të shqiptarëve ka qenë vazhdimisht pjesë e diskursit dhe argumentimit politik të tyre.

Por, krahas këtij diskursi, shtrohen edhe pyetje të tjera: çfarë kanë përfituar konkretisht qytetarët nga përfaqësimi institucional? Sa janë avancuar të drejtat e tyre? Dhe a është shndërruar mbajtja e pozitave politike në një qëllim në vetvete?

Për shumë qytetarë, festimet e fitores nuk janë përgjigje ndaj këtyre pyetjeve. Përkundrazi, ato e bëjnë edhe më të domosdoshëm një bilanc publik të përgjegjësisë politike.

Në fund të fundit, Këshilli Kombëtar Shqiptar nuk duhet të jetë pronë e asnjë partie, klani apo individi. Ai duhet të jetë institucion i përfaqësimit të shqiptarëve, i cili merr legjitimitetin nga vota e lirë dhe e ndershme e qytetarëve.

Nëse ekzistojnë dyshime për manipulime, mospërputhje të listave apo parregullsi në vendvotime, ato duhet të dokumentohen dhe të hetohen. Askush nuk duhet të shpallet fajtor pa prova, por asnjë dyshim serioz nuk duhet të mbetet pa përgjigje.

Sepse vota e qytetarit nuk është pronë e partive politike, ndërsa kutia e votimit nuk është kasafortë për ruajtjen e pushtetit!

Lugina ka nevojë për përfaqësues që fitojnë besimin e qytetarëve, jo vetëm për politikanë që festojnë rezultatet./Jetapress/